Áskorun

Ég hallast að því að besta nammi í heimi (fyrir utan heimabakað ömmubakkelsi) sé súkkulaðihúðað oreo kex. Framleiðandinn fær fullt hús stiga fyrir hugmyndina. Hann var búinn að finna upp besta kex í heimi... hmmm... látum okkur nú sjá, hvernig er hægt að gera best enn betra? Aha! Með súkkulaðihúð.

Þó er galli á gjöf Gvends og grunaði ekki Njörð. Þetta er óumhverfisvænasta nammi í heimi, enda alamerísk framleiðsla. Kexinu er pakkað í pappakassa og hverjum tveimur kexkökum pakkað í álpappír.

Því er ég þess fullviss að við Íslendingar getum gert enn betur með okkar heimsfrægu nammiframleiðsluhæfileika að vopni. Hvað er alíslenskara en Sæmundur í sparifötunum og hvað er alíslenskara en kexverksmiðja að nafni Frón?

Ég skora hér með á kexverksmiðjuna Frón að súkkulaðihúða Sæmund og pakka inn í umhverfisvænar umbúðir úr óbleiktum, endurvinnanlegum pappa.

Til hamingju, Frónverjar, heimsyfirráð eru í augnsýn!