Kúba

Fréttirnar eru fullar af hroðafréttum um Kúbu. Ég veit vel að það er víða pottur brotinn í stjórnarháttunum þar á bæ, en það er það bara mjög víða annars staðar. Þjóðhöfðingi með hreinan skjöld er vandfundinn í veröldinni og þó svo að hægt sé að finna að ýmsu við stjórnarhætti Kastros, þá er það mjög villandi að bera Kúbu iðulega saman við vestræn ríki eins og fréttamönnum er tamt. Samfélagið á Kúbu kemur mjög vel út í samanburði við grannríki á borð við Haiti, Honduras og Dóminíkanska lýðveldið. Ofan á allt saman er heimsbyggðin látið trúa því að fátækt hafi fyrst litið dagsins ljós á Kúbu eftir byltinguna. Af hverju var gerð bylting á Kúbu?
Svo ég beiti sömu aðferðum og fréttamenn og haldi áfram að bera Kúbu saman við ósamanburðarhæf lönd eins og Bandaríkin, þá held ég t.d. að þó fátækt sé mikil á Kúbu, að þá sé auðveldara að vera fátækur á Kúbu en í Bandaríkjunum. Á Kúbu geturðu t.d. farið til læknis þótt þú sért fátækur, jafnvel farið í skóla, en það er ekki hægt í Bandaríkjunum. Ég er nú bara ósköp venjulegur Íslendingur, ekkert mjög illa stæður fátæklingur, en ég hef afskrifað framhaldsnám í Bandaríkjunum vegna skólagjalda.
Þetta er allt tómt prump. Það að bera Kúbu saman við Bandaríkin og önnur vestræn ríki er eins og að bera Eþíópíu saman við Bretland.
Að lokum vil ég minna á þau gömlu góðu sannindi að kenningin um að sykur sé óhollur er ekkert annað en kapítalískt samsæri, því þær raddir fóru ekki að heyrast fyrr en Bandaríkjamenn settu útflutningsbann á kúbanska sykurinn. Borðið sykur og nóg af honum!

Verði ykkur að góðu,