Tímamót

Ég brautskráðist frá Tónlistarskólanum í Reykjavík í gær með burtfararpróf í tónsmíðum.

Ég lagði fram möppu með tveimur stökum tónverkum frá því í fyrra og svo lokaverkefnið, sönglagaflokkinn Ljóðasmygl og skáldarán, sem eru sönglög við ljóð Andra Snæs Magnasonar úr samnefndri ljóðabók. Karólína Eiríksdóttir prófdæmdi. Ég sá einkunnina mína í fyrsta skiptið þegar ég opnaði umslagið með skírteininu mínu. Ég var svo hissa að ég sat í gærkvöldi og glápti á umsögnina. Ég ætlaði að vera löngu útskrifuð úr þessum skóla, en tók, eins og flestum er kunnugt um, nokkrar krókaleiðir að lokatakmarkinu. Píanóið var markmiðið í upphafi, en eftir fyrsta tónsmíðatímann vissi ég svosem alveg að það yrði ekki aftur snúið, þó ég fengist ekki til að viðurkenna það strax. Og í dag sé ég ekki eftir því.

Pabbi hefði orðið 52 ára í dag. Ég heyrði í ömmu í tilefni dagsins, ætla að hringja í Grétu og litla bróður líka og elda svo góðan mat í kvöld.

Mennirnir elska, missa, gráta og sakna.